Մարտի 21-ին, «Սարդարապատ» ֆուտբոլային ակումբը, լինելով հայ-ֆրանսիական համագործակցության վառ օրինակ և ամենախոշոր հայ-ֆրանսիական ֆուտբոլային նախագիծը, հյուրընկալել էր Ֆրանսիայի սպորտի դեսպան Սամուել Դյուկրոքեին: Այցին ներկա էին նաև Հայաստանում ֆրանսիական դեսպանության Մշակույթի և համագործակցության հարցերով խորհրդական Քսավիե Ռիշարը, Տնտեսական և տեխնիկական համագործակցության հարցերով կցորդ Էվան Դա Կոստա Մարկեսը, և Արմավիրի համայնքապետ Վարշամ Սարգսյանը: Այցի շրջանակներում ակումբի գլխավոր տնօրեն Անուշ Անանյանն ու գործառնական տնօրեն Մարիամ Խաչատրյանը ներկայացրեցին հյուրերին «Սարդարապատ» ՖԱ -ի պատմությունը, ակադեմիան, ենթակառուցվածքը և ակումբի առաքելությունն ու սահմանած նպատակները: Հանդիպմանը քննարկվեցին «Սարդարապատ»-ի ընթացիկ և առաջիկա ծրագրերը, ինչպես նաև համատեղ աշխատանքի եզրերը հայ-ֆրանսիական համագործակցության շրջանակներում։
«Մեծ պատիվ էր հյուրընկալել Ֆրանսիայի սպորտի դեսպանին և Ֆրանսիայի դեսպանության մեր ֆրանսիացի գործընկերներին ու պատմել «Սարդարապատ» ՖԱ-ի մասին։ Վստահ եմ՝ այս համագործակցությունը նոր էջ կբացի ակումբի և տարածաշրջանում ֆուտբոլի զարգացման համար», – նշում է Անուշ Անանյանը:
Սպորտի դեսպանը, ով նաև «Սարդարապատ» ՖԱ-ի գործընկեր «Լանս» Ֆուտբոլային ակումբի (RC Lens) երկրպագու է, ակադեմիայի մի քանի սաների հետ հարց ու պատասխան ֆորմատով կիսվեցիր տպավորություններով, նշելով, որ «երբ փոքր տարիքում խաղում էր ֆուտբոլ, նման հնարավորությունների ու հարմարությունների մասին կարող էր միայն երազել»: Սամուել Դյուկրոքեն ընդգծեց նաև սպորտի միավորելու հատկությունը՝ օրինակ բերելով Փարիզում 2024 թվականին կայացած Ամառային օլիմպիական խաղերը, ինչպես նաև 2027 թվականին Հայաստանում կազմակերպվելիք Ֆրանկոֆոնիայի խաղերը: Սպորտի դեսպանի ու Ֆրանսիայի դեսպանության ներկայացուցիչների այցը եզրափակվեց ակադեմիայի սաների հետ խաղով, որի ընթացքում պարոն Դյուկրոքեն հնարավորություն ունեցավ ցուցադրել իր ֆուտբոլային ունակությունները: